औसा शहरातील भाजी विक्रेत्यांना त्यांच्या हक्काची जागा द्या
औसा, (शहर प्रतिनिधी) - औसा शहरातील भाजी विक्रेत्यांना त्यांच्या हक्काची जागा मिळावी यासाठी काँग्रेस, राष्ट्रवादी काँग्रेस (शरद पवार गट) आणि वंचित बहुजन आघाडीच्या वतीने औसा नगरपालिकेच्या मुख्याधिकाऱ्यांना निवेदन देण्यात आले. सध्याच्या सत्ताधारी युतीवर भाजी विक्रेत्यांना त्यांच्या हक्काच्या जागेपासून वंचित ठेवण्याचा आणि त्यांची उपासमार करण्याचा कट रचल्याचा आरोप यावेळी करण्यात आला.
औसा शहराच्या विकासाचा विचार करून, तत्कालीन काँग्रेस नगरपालिकेच्या कौन्सिलने शहरातील गरीब भाजी विक्रेत्यांसाठी सर्वे नं. ८८ मधील १६ गुंठे जागा आरक्षित केली होती. ही जागा शहराच्या मध्यभागी आणि वर्दळीच्या ठिकाणी असल्यामुळे भाजी विक्रेत्यांसाठी अत्यंत सोयीची आहे. यामुळे त्यांचा व्यवसाय चांगला वाढू शकतो.
मात्र, सध्याचे सत्ताधारी पक्ष ही जागा भाजी विक्रेत्यांना न देता, त्यांना इतर ठिकाणी जागा देण्याचा प्रयत्न करत असल्याचा आरोप निवेदनातून करण्यात आला आहे. ही जागा शहराबाहेर किंवा कमी वर्दळीच्या ठिकाणी असल्याने, भाजी विक्रेत्यांचा व्यवसाय बुडण्याची भीती व्यक्त केली जात आहे.
या गंभीर प्रश्नाकडे नगरपालिकेने लक्ष न दिल्यास, शहरातील सर्व भाजी विक्रेते, पथ विक्रेते आणि हातगाडीवाले यांच्या सोबत मिळून तीव्र आंदोलन करण्याचा इशारा काँग्रेस, राष्ट्रवादी काँग्रेस (शरद पवार गट) आणि वंचित बहुजन आघाडीने दिला आहे.
या मागणीमुळे शहरातील गरीब आणि गरजू भाजी विक्रेत्यांच्या हिताचे रक्षण व्हावे, अशी अपेक्षा व्यक्त केली जात आहे. स्थानिक प्रशासनाने या प्रश्नावर तातडीने तोडगा काढावा, अशी मागणी जोर धरत आहे.यावेळी निवेदन देताना भारतीय कॉग्रेस पक्षाचे खुंदमीर मुल्ला, सय्यद अ. खादर,शेख पाशाभाई, न्यामत लोहारे,राष्ट्रवादी काँग्रेस शरद पवार गटचे शेख सनाऊल्ला दारुवाले, वंचित बहुजन आघाडीचे शहराध्यक्ष सद्दाम पठाण, इलियास चौधरी, संतोष कांबळे यांची उपस्थिती होती.
0 टिप्पण्या