हर घर तिरंगा, हर मन तिरंगा’ अभियानाची बुधोड्यात उत्साहात सुरुवात

 ‘हर घर तिरंगा, हर मन तिरंगा’ अभियानाची बुधोड्यात उत्साहात सुरुवात

जि.प. प्राथमिक शाळेत तिरंगा यात्रेने दुमदुमले गाव; विद्यार्थी, शिक्षक व ग्रामस्थांचा उत्स्फूर्त सहभाग

बुधोडा, दि. ९ ऑगस्ट :

‘हर घर तिरंगा अभियान, लातूर’ अंतर्गत दि. ९ ते १७ ऑगस्ट २०२६ या कालावधीत विविध देशभक्तीपर व सांस्कृतिक कार्यक्रमांचे आयोजन जि.प. प्राथमिक शाळा, बुधोडा येथे करण्यात आले आहे. या अभियानाची सुरुवात आज (दि. ९) उत्साहपूर्ण वातावरणात तिरंगा यात्रेने करण्यात आली.

शाळेतील शिक्षक, विद्यार्थी तसेच ग्रामस्थांनी हातात तिरंगा ध्वज घेऊन तिरंगा यात्रेत उत्स्फूर्त सहभाग नोंदविला. गावातील विविध भागांतून मार्गक्रमण करणाऱ्या या यात्रेदरम्यान ठिकठिकाणी ग्रामस्थांनी सहभागी होत देशभक्तीचा उत्साह वाढविला. ‘भारत माता की जय’, ‘क्रांती दिनाचा विजय असो’, ‘वंदे मातरम्’, ‘आपले गाव—स्वच्छ, सुंदर गाव’ अशा घोषणांनी संपूर्ण परिसर दुमदुमून गेला.

क्रांती दिन व आगामी स्वातंत्र्य दिनाच्या पार्श्वभूमीवर आयोजित करण्यात आलेल्या या उपक्रमामुळे विद्यार्थ्यांमध्ये देशप्रेम, राष्ट्रीय एकात्मता आणि सामाजिक बांधिलकीची भावना वृद्धिंगत होत असल्याचे चित्र पाहायला मिळाले.

येत्या सप्ताहात शाळेच्या वतीने निबंध व वक्तृत्व स्पर्धा, तिरंगा मॅरेथॉन, विद्युत रोषणाई, तिरंगा रॅली, देशभक्तीपर चित्रपट प्रदर्शन, सांस्कृतिक कार्यक्रम, तिरंगा प्रतिज्ञा, सेल्फी अपलोड, प्रभात फेरी तसेच शालेय स्पर्धांचे आयोजन व बक्षीस वितरण असे विविध उपक्रम घेण्यात येणार आहेत.

‘हर घर तिरंगा—हर मन तिरंगा’ या संकल्पनेतून संपूर्ण सप्ताह देशभक्तीमय वातावरणात साजरा करण्यात येणार असून, त्याची दिमाखदार सुरुवात आजच्या तिरंगा यात्रेने झाली.